حابب تعرف مين وراء بادية جينز؟

أنا محمد عبدالرحمن، مدرب معتمد وأخصائي تغذية، لكن رحلتي بدأت قبل ما أدخل المجال بسنين.

من وأنا في الثانوية كان حلمي الالتحاق بالكليات العسكرية. لكن الواقع وقتها كان صعب: جسمي رفيع جدًا، لياقتي ضعيفة، وحتى قوامي ما كانش مساعدني. ومع بداية كورونا وإغلاق الجيمات، بقي الحلم أبعد.

لكن بدل ما أستسلم، بدأت أتمرن بالمتاح والإمكانيات البسيطة. ومع كل يوم تدريب، جسمي اتغير ولياقتي اتطورت. ولما رجعت الجيمات تفتح، كنت جاهز أكمل بشكل أقوى. النتيجة؟ قدرت أوصل لشكل جسم ما كنتش حتى أتخيل إني أحققه، جسم متوازن شكلاً وأداءً. الاختبارات الرياضية اللي كانت بتقف عائق قدامي، بقت أسهل بكتير، وقدرت مش بس أجتازها… قدرت أكسرها.

ورغم إن طريقي مانتهاش بالكليات العسكرية، إلا إني اكتشفت حاجة أهم:
أنا وصلت لهدف عمري ما كنت أتخيله. واللي خلاني أقول: "لو أنا قدرت أوصل هنا… يبقى أي حد عنده هدف،
يقدر هو كمان يحققه".

ومن هنا بدأت أخد الموضوع بشكل علمي أعمق.
دخلت كورسات متخصصة وورش عمل كتيرة جدًا في التدريب والتغذية، وحصلت على اعتماد كـ مدرب وأخصائي تغذية معتمد.
ليه؟ عشان أطور نفسي باستمرار وأضمن إن كل شخص يبدأ معانا يلاقي أفضل خدمة، ويوصل لأهدافه في أقل وقت ممكن وبأقل مخاطرة إصابات.

ومن هنا كمان اتولدت فكرة بادية جينز.
الاسم مستوحى من " البَادِيَةُ " قديمًا، المكان اللي كان بيتربى فيه العرب في ظروف قاسية تصنع منهم قادة. كانوا بيدخلوا أطفال عاديين، ويخرجوا رجال أقوياء جسديًا وذهنيًا. وده بالظبط اللي بنعمله هنا: أي شخص يدخل بادية جينز، بيدخل بهيئة وفكر معين… ويخرج مختلف تمامًا: أقوى، أذكى، وأكثر ثقة بنفسه.

بادية جينز مش مجرد تدريب أو نظام تغذية.
دي رحلة حقيقية لتغيير حياتك… من جسمك، لعقلك، لثقتك بنفسك.